Kur ngjitesh përsipër fshatit Malaj, njërit prej 16 fshatrave të bashkisë së Rrëshenit, në kodrën që duket se e ndan si me një kurriz breshke fshatin në dy pjesë, bie në sy një varr interesant, a më saktë të thuhet, kryqi ornamental që i rri mbi krye, i stilizuar hijshëm mbi një gur të bardhë. Vitet kanë bërë punën e tyre, por shenja dalluese e varrit u ka rezistuar stoikisht moteve, madje edhe dhunës që është ushtruar mbi të, atë kohë kur kishte filluar “lufta ndaj kryqeve” dhe çdo simboli fetar mbi faqe të “dheut”; në kisha, xhami a tjetër vend të shenjtë, madje deri tek varret. Të moshuarit dëshmojnë se mbi këtë kryq është përdorur edhe çekiqi i rëndë, por dhe levat e litarët prej çeliku lidhur nga pas me makina tip zis të kooperativës, por kryqi është treguar tepër “kryeneç” dhe nuk ka lëvizur prej andej, për të na dëshmuar si histori ndërtimesh në ditët e sotme.